Wednesday, April 30, 2014

அருட்பெருஞ்சோதி அகவல் - 12

இன்று ஒரு அகவல்:




உரை மனங் கடந்த ஒரு பேரு வெளி மேல் அரைசு செய்து ஓங்கும் அருட்பெருஞ்ஜோதி (அருட்பெரும்ஜோதி அகவல் - 12) 

மனம், வாக்கு, காயம், ஆகிய மூன்றையும் திரிகரணம் என்பார்கள். தேகத்தை எந்தக் காரியமும் செய்யாமல் சும்மா வைத்திருக்கலாம். வாயினாலும் பேசாமல் சும்மா இருக்கலாம். ஆனால் மனதைச் சும்மா வைத்திருக்க முடியுமா? எப்போதும் எதையாவது நினைத்துக் கொண்டேதான் இருக்கும். நிதம் எண்பது கோடி நினைவுகள் ஏற்படுமாம். மனதினாலே மந்திரங்களை (நமசிவய, சிவ சிவ, சரவணபவ) உச்சாடனம் செய்வதற்கு ஜெபம் என்று பெயர். ஏதாவது ஓர் உருவத்தை வெளியே பார்த்து அதை அப்படியே கண்களை மூடிக்கொண்டு உள்ளே காண முயற்சி செய்வதற்குத் தியானம் என்று பெயர். 

மனதிலே எதையும் நினையாமல் சும்மா இருப்பதற்குத் தவம் என்று பெயர்
. இந்த மூன்றில் சிறந்தது தவமே. மனம் செயல்படாது நின்று போனால் அங்கே தோன்றுவது சூன்யம். அதாவது வெளி. அதுவே பேரு வெளி.

மனம் செயல்படுகின்ற வரையில் இறை அனுபவம் கிட்டாது.

இதையே தாயுமான சுவாமிகள் "
சினம் இறக்க கற்றாலும் சித்திஎல்லாம் பெற்றாலும்
மனம் இறக்க கல்லார்க்கு வாயேன் பராபரமே
" என்கிறார். 

மனதின் செயல்பாடு அற்றவுடன் ஏற்படுகின்ற மௌன வெளியில் தன்னரசு செலுத்தி ஓங்கி நிற்கின்ற அருட்பெரும்ஜோதி. மன உணர்வு செல்லாத் தளத்தாடும் பெருமான் வடிவை உரைக்கவல்லார் யார் வழுத்தாய் என்கின்றார் வள்ளலார். 

காற்றுருவோ கனலுருவோ கடவுளுறு என்பார்
காற்றுருவும் கனலுருவும் கண்டுரைப்பீரென்றால்
வேற்றுருவே புகல்வர் அதை வேறொன்றால் மறுத்தால்
விழித்து விழித்து எம்போல்வார் மிகவும் மருள்கின்றார்
தோற்றுமந்தத் தத்துவமும் தோற்றாத தத்துவமும்
துரிசாக அவை கடந்த சுக சொருபமாகி
மாற்ற மனவுணர்வு செல்லாத் தலத்தாடும்
பெருமான் வடிவுரைக்க வல்லவரார் வழுத்தாய் என் தோழி (
திருவருட்பா 5638)

மனம் கடந்த மௌன நிலையில் அருட்பெரும்ஜோதி அனுபவமாக விளங்கும் என்பதே முடிவான கருத்து.

ஜாக்ரத், சொப்பனம், சுழுத்தி, துரியம், துரியாதீதம் என அவஸ்தைகள் ஐந்து என்பர். 

சொப்னம் - தூக்க நிலையில் மனம் செயல்படுவது
சுழுத்தி     - உறக்க நிலையில் மனம் செயல்படாது இருப்பது 
ஜாக்ரத்     - விழிப்பு நிலையில் மனம் செயல்படுவது 
துரியம்     - விழிப்பு நிலையில் மனம் செயல்படாது இருப்பது. 

துரிய மலை மேல் உளதோர் ஜோதி வள நாடு
தோன்றும் அதில் ஐயர் நடம செய்யும் மணி வீடு
தெரியுமது கண்டவர்கள் கானில் உயிரோடு
செத்தார் எழுவார் என்று கைத்தாளம் போடு
(திருவருட்பா 5263

விழிப்பு நிலையில் மனம் செயல்படாது நிற்கும் நிலையே துரியம் - அதுவே தவம். அந்நிலையில் பெருஞ்ஜோதிக் காட்சி தோன்றும். இதே அனுபவத்தைத் தான் மனங் கடந்த பேரு வெளி மேல் அரைசு செய்து அருட்பெரும்ஜோதி ஓங்கும் என்கிறார்.

No comments:

Next previous home
Related Posts Plugin for WordPress, Blogger...