Tuesday, April 22, 2014

திருக்கழுக்குன்றப் பதிகம்


திருக்கழுக்குன்றப் பதிகம்

திருவாகிய இறைவன் குன்றத்தின் கழுத்திலே அமர்ந்ததால் இந்த இடம் திருக்கழுக்குன்றம் என்பதாம்! கண் ஆகிய குன்றத்தின் கழுத்து பகுதி - மணி ஊசிமுனை துவாரத்தின் உள்பகுதியிலே விளங்கும் நெருப்பு புள்ளி!

"உணக்கி லாததோர் வித்து மேல்வினை 
யாமல் என்வினை ஒத்தபின் 
கணக்கி லாத்திருக் கோலம் நீவந்து 
காட்டி னாய்கழுக் குன்றிலே" 

எங்கள் ஊரில் வீட்டில் மளிகை பொருட்களை வாங்கி முதலில் வெயிலில் காய வைப்பார்கள். பின் பொடிசெய்து கொள்ள வேண்டியதை பொடி செய்து வைத்துக்கொள்வர்! வெயிலில் காய வைத்த பொருட்களை காய்ந்தாகிவிட்டதா உலர்ந்து விட்டதா என்பதை "உணங்கியாட்சா" என்பர்! மாணிக்கவாசகர் அருளிய திருவாசக சொற்கள் தூய தமிழ்ச்சொற்கள்! இங்கே உணக்கிலாததோர் வித்து என்பது காயாத - ஈரம் போகாத வித்து எனப்பொருள்! காய்ந்த வித்து முளைவிடாது! ஈரப்பதமான வித்துதான் முளைக்கும்! இங்கு நம் பாவவினைகள் மும்மலங்களால் சூழப்பட்ட ஆன்மஒளி ஈரப்பதமாக இருக்கும்! நாம் ஞானதவம் செய்து சுத்த உஷ்ணத்தை பெருகச் செய்தால் வித்து உலரும்! நம் ஆன்மவித்து ஈரம்போய், மும்மலம்போய் ஒளியால் வருபட்டுவிடும்! தீயில் வாடிய வித்து எப்படி முளைக்கும்?! நாம் மீண்டும் பிறக்காமல் இருக்க நம் ஆன்மாவை ஈரப்பதம் இல்லாமல் சூடேற்றி உலர வைத்து பின் வறுத்துவிட வேண்டும். நாம் மீண்டும் முளைக்க மாட்டோம்! பிறக்க மாட்டோம் எவ்வளவு அருமையான உதாரணம் கொடுத்து கூறுகிறார் மாணிக்கவாசகப்பெருமான்!

இறைவா என் வினை நீங்க நீயே கணக்கிலா திருக்கோலம் - ஒளி பல வண்ணத்தில் காட்டி, தீ பெருக்கிடச் செய்து அருளினால் கழுக்குன்றிலே - குன்றமாகிய கண்மணியின் கழுத்துப் பகுதியாகிய மணிமத்தி உள் பகுதியிலே ஒளிகாட்டி அருள்செய்தாய் என்கிறார்! ஒளி பெருக்கி வினை எரிந்து பிறவாநிலை பெறலாம்!

"மலங்கி னேன்கண்ணின் நீரை மாற்றி
மலங்கெ டுத்தபெ ருந்துறை"

மலங்க மலங்க விழித்தேன் செய்வதறியாது! உலகச் சேற்றிலே வீழ்ந்து உழலும் மனிதன் இப்படிதான் பேந்தப் பேந்த மலங்க மலங்க விழிப்பான்! சரியான வழிகாட்டுதல் இல்லையேல் அதோகதிதான்! வழிகாட்டுபவர் குரு! ஞானத்துக்கு வழிசொல்லி விழியை திறந்து உணர்வூட்டி தவம் செய்யும் முறை சொல்லித்தருவார்! ஞானசற்குரு! ஞானதவம் செய்யும்போது செய்வதறியாது இறைவா - கையிலே கழுக்குன்ற பெருமான் பெருந்துறையான் நீரை மாற்றி ஒளியை பெருக்கி மும்மலங்களை நீக்கி நம்மை காத்தருள்வான்! ஞான அனுபவம் இது! முதலில் கண்ணீர் ஆறாக பெருகி ஓடும். பின் நீர்வற்றி மலங்கழியும் மும்மலம் அகல ஆரம்பிக்கும்! இப்படியே தவம் தொடர தொடர நம் ஆன்மா தூய்மையாகும். பிறவா பெருநிலை பெறலாம்! இறையருளால்!

இறைவன் பிட்டுக்காக மண் சுமந்து பித்தனாய் வந்தவன்! சுந்தரரை ஆட்கொள்ள நீதிமான்முன் வழக்குரைத்தவன்! உன் அழகிய பொற்பாதம் இருக்குமிடமறியாமல் கலங்கிய எனக்கு காட்டியருளினாய் கழுக்குன்றிலே! ஒவ்வொரு ஊர்ப்பெயரும் மறைமுகமாக கண்ணையே குறிக்கும். திருகண்ணப்புரம், என்கண், திருக்கண்டீஸ்வரம், திருக்கண்ணமங்கை, கண்ணனூர், எட்டுக்குடி இப்படி பலநூறு ஊர்ப்பெயர்கள் கண்ணை குறிப்பிடுகின்றன!.

No comments:

Next previous home
Related Posts Plugin for WordPress, Blogger...